Mshambuliaji wa Timu ya Simba, Shiza
Kichuya akiachia shuti lililopelekea
kuipatia Timu yake bao la tatu dhidi ya
Timu ya Ndanda, katika mchezo wa Ligi
Kuu ya Vodacom Tanzania uliochezwa
jioni ya leo kwenye Uwanja wa Taifa, Jijini
Dar es salaam. Simba imeshinda Bao 3-1.
Mshambuliaji wa Timu ya Simba, Shiza
Kichuya akishangilia Ushindi sambamba
na Mashabiki wa Simba baada ya kuipatia
timu yake bao la tatu dhidi ya Timu ya
Ndanda, katika mchezo wa Ligi Kuu ya
Vodacom Tanzania uliochezwa jioni ya leo
kwenye Uwanja wa Taifa, Jijini Dar es
salaam. Simba imeshinda Bao 3-1.
Mshambiaji wa Simba, Laudit Mavugo
akiondoka na kijiji cha wachezaji wa
Ndanda katika mchezo wa Ligi Kuu ya
Vodacom Tanzania uliochezwa jioni ya leo
kwenye Uwanja wa Taifa, Jijini Dar es
salaam. Simba imeshinda Bao 3-1.
Kipa wa Simba, Vincent Agban akiruka na
kuusindikiza kwa macho mpira ukiingia
wavuni baada ya kupigwa kichwa safi
kabisa na Mshambuliaji wa Timu ya
Ndanda, Omary Mponda na ikiwa ni goli
la kufutia machozi katika mchezo wa Ligi
Kuu ya Vodacom Tanzania uliochezwa
jioni ya leo kwenye Uwanja wa Taifa, Jijini
Dar es salaam. Simba imeshinda Bao 3-1.
Beki wa Simba, Mohamed Hussein
akiondoka na mpira.

BASATA Yatoa Salamu Za Rambirambi
Kufuatia Kifo Cha Msanii Shakila
Baraza la Sanaa la Taifa (BASATA) limepokea
kwa masikitiko na majonzi makubwa kifo cha
Msanii wa muziki wa taarab Bi. Shakila Said
kilichotokea ghafla nyumbani kwao Mbagala
jijini Dar es Salaam jana Ijumaa ya tarehe
19/08/2016.
Shakila ni msanii na mdau wa muda mrefu wa
sekta ya Sanaa nchini. Amekuwa na mchango
mkubwa katika kukuza muziki wa taarab nchini
hasa katika kubuni kazi za Sanaa za muziki
mbalimbali ambazo zilikuja kupata umaarufu
mkubwa. Moja ya kazi alizobuni na kupata
umaarufu mkubwa ni pamoja na 'Macho
yanacheka' na 'kifo cha mahaba'.
Mchango wake katika muziki wa taarab hasa
katika kubuni na kutunga nyimbo zenye ubora,
ujumbe na maadili kwa jamii hautasahaulika
kamwe. Ni mwanamuziki aliyeacha misingi
katika sekta ya muziki na alijitolea kwa kiasi
kikubwa katika kuufikisha muziki wa taarab
mahali ulipo leo.
Baraza, wasanii na wadau wote wa Sanaa
hatuna budi kuendelea kuenzi mema yote
aliyotuachia marehemu Shakila hasa katika
kupenda kujitolea muda mwingi katika kukuza
muziki wa taarab na sekta ya muziki kwa
ujumla.
Baraza linatoa pole kwa ndugu wa marehemu,
shirikisho la muziki, wasanii na wadau wote wa
Sanaa katika kipindi hiki kigumu cha
kuondokewa na mpendwa wetu.
Bwana ametoa na Bwana ametwaa, Amen

Kocha mkuu wa klabu ya Al Ahly ya Misri
amejiuzulu chini ya mwaka mmoja baada ya
kuteuliwa kuongoza klabu hiyo.
Mholanzi Martin Jol amejizulu baada ya
kuhudumu kwa miezi sita pekee akisema
anahofia usalama wake.
Mashabiki wa klabu hiyo walionekana kukerwa
sana na kushindwa kwa timu hiyo kufika hatua ya
nusufainali Ligi ya Mabingwa Afrika.
Jol alijibizana na mashabiki Ijumaa iliyopita
baada ya timu yake kutoka sare 2-2 na klabu ya
Zesco United na kuzima matumaini yao ya
kusonga mbele.
Tangu wakati huo amepokea vitisho pia kupitia
mitandao ya kijamii jambo ambalo anasema
limechangia uamuzi wake wa kuondoka.
Source: BBC

Irene M. NDAUK
ILIPOISHIA IJUMAA WIKIENDA:
Hamadi! Sura ya baba Mei hii hapa! Mzee Hewa
akashtuka kwani wakati mlango unafunguliwa
alishaweka sura ya tabasamu akijua atamwona
mama Mei. Kwa hiyo alipokutana na sura ya
baba Mei ghafla, alikunja sura ghafla…
SASA TAMBAA NAYO MWENYEWE…
“HAA! Hujambo bwana mdogo?” mzee Hewa
alisalimia huku uso wake ukiwa haujakaa
sawasawa…
“Sijambo mzee, shikamoo…”
“Marhaba, za safari bwana?”
“Ni njema mzee wangu…vipi, nikusaidie nini?”
Mzee huyo alibabaika kwa mbali hali
iliyomshangaza sana baba Mei…
“Nilitaka kujua kama kuna gesi maana jiko langu
la gesi lime…aaah! Nataka kuazima kibiriti kwa
mama! Oooh! Nimepitiwa, kuna maji ya baridi ya
moto? Ha! Mimi naye kwa kusahausahau sijambo
kidogo…naulizia milango kama mmefunga.”
Baba Mei alibaki akimtumbulia macho tu huku
akijiuliza ni kitu gani kinamfanya mzee huyo
ababaike kusema kama kweli aligonga mlango
akiwa na shida ndani kwake…
“Mzee wangu kwani kuna nini, sikuelewi…”
“Haa! Nilikosea kijana kugonga kwako, nilikusudia
mlango ule,” alisema mzee Hewa huku akiondoka
kurudi kwake.
Ile baba Mei anageuka tu, mama Mei anatoka
chumbani…
“Vipi, ni nani?” alimuuliza mume wake…
“Ah! Mimi sijamwelewa mzee wako…nadhani
kuna kitu zaidi ya ujio wake,” alijibu baba Mei
huku akiingia chumbani moja kwa moja.
Mama Mei naye alifuata na kumkuta mume wake
akiwa amelala akiangalia juu kwa mawazo…
“Yule mzee asitake kuleta longolongo, kwa
vyovyote vile alimfuata mke wangu. Inaonekana
hakujua kama mimi nimerudi,” alisema moyoni
baba Mei…
“Baba Mei kwani kasemaje?”
“Nani?”
“Mzee mwenye nyumba?”
“Ah! Mimi sijamwelewa hata kidogo. Kwanza
nahisi shida yake kubwa ni wewe ila mimi
niliingilia kwa bahati mbaya tu…”
“Kwani amesemaje?”
“Hakuna kilichoeleweka… alipokutana macho na
mimi, kwanza akashtuka sana. baada ya salamu
akaniuliza habari za safari nikamwambia nzuri,
akasema nilitaka kujua kama kuna gesi maana
jiko langu la gesi lime…akasita, kisha akasema
nataka kuazima kibiriti kwa mama! Akaacha,
akasema oooh! Nimepitiwa, kuna maji ya baridi
ya moto? Pia akaacha akasema naulizia milango
kama mmefunga…”
“Khaa! Ndiyo nini sasa?” aliuliza mama Mei huku
akionesha kushangaa. Lakini moyoni alijua moja
kwa moja kwamba, mzee huyo alikuwa na shida
na yeye ila hakujua kama mume wake
alisharejea…
“Mimi sijui ndiyo nini!” alisema kwa mkato baba
Mei na kugeukia kwingine hali iliyompa ishara
mkewe kwamba, kuna jambo mumewe
amejifunza kuhusu ujio wa mzee mwenye
nyumba.
Mama Mei alibaki kimya. Alitamani sana
kumsemesha mume wake lakini angemsemesha
nini wakati mumewe amehisi jambo?
Kumsemesha kungemfanya ajulikane kwa undani
zaidi.
Usiku wa manane, baba Mei alishtuka na kujikuta
akimuwaza mzee Hewa, lakini pia akapata na
mawazo kuhusu ule ukaribu aliouona kati ya
mkewe na mpangaji mwenzao, Mfaume…
“Inaonekana kuna kitu kilikuwa kikiendelea wakati
mimi sipo. Mbona huyu mke wangu kama
amekuwa mwenyeji sana na hawa watu?”
alijiuliza.
Kitabia, baba Mei si mtu wa kukurupuka! Mambo
yake mengi hupenda kuyafanya kwa polepole na
utaratibu huku akihakikisha kama ni jambo
analipata kwa ukamilifu akitumia mahesabu ya
mwaka!
Alijichanga akili, akaamua kuweka mtego wa
makusudi ili kujua kama kweli mke wake ana
jambo la ziada au la, ni mawazo yake tu!
***
Kulipokucha, mama Mei alitoka kitandani na
kuendelea na kazi nyingine za kila siku za
nyumbani kwake.
Asubuhi hiyo, alikuwa amekunja sura vibaya
sana. hakumchangamkia mtu yeyote ndani ya
nyumba ile maana alijua wanataka kumweka
pabaya!
Baba Mei alipoamka, alikwenda kuoga na kurudi
ndani. Alivaa, akaenda sebuleni kunywa chai!
Hapo alimwita mkewe…
“Abee…”
“Njoo mara moja.”
Mama Mei alipofika alikaa akimwangalia mume
wake kwa macho yaliyojaa wasiwasi…
“Mimi jioni leo nasafiri tena, nakwenda Tanga
halafu Arusha,” alisema baba Mei kisha
akamwangalia mkewe ambaye aliachia sura ya
tabasamu kutoka ile ya wasiwasi…
“He! Yaani unaunga mume wangu?”
“Ndiyo kazi sasa mke wangu, nitafanyaje?”
“Kweli lakini,” alisema mama Mei huku akiachia
tabasamu pana…
“Kwa hiyo nilitaka ulijue hilo tu mke wangu
maana nikiondoka nikirudi jioni ni safari,” alisema
baba Mei na kuendelea kunywa chai…
“Sawa mume wangu, safari njema,” alisema
mama Mei naye huku akiondoka.
Baba Mei alimwangalia mkewe akatingisha
kichwa huku moyoni akisema…
Je, nini kilitokea hapo? Usikose kusoma Gazeti
la Ijumaa, Ijumaa ijayo. Pia soma chombezo
langu lingine kwenye Gazeti la Uwazi,

Kwa mujibu wa familia marehemu Bi.
Shakila Saidi anatarajiwa kuzikwa leo
Jumamosi Agosti 20, 2016 saa 10 alasiri
katika makaburi ya Uwanja wa Ninja huko
Mbagala Charambe jijini Dar es salaam
Namna ya kufika msibani nyumbani kwa
marehemu kwa kutumia daladala.
Unapanda magari ya Mbagala Rangi Tatu,
ukifika mwisho unachukua basi la Nzasa
na unashuka Mnara wa Voda hapo
unauliza kwa Bi Shakila utaonyeshwa.
Bi Shakila alifariki jana baada ya
kuanguka nyumbani kwake mara baada ya
kuswali swala ya Magharibi. Kwa mujibu
wa binti yake, Shani, mkongwe huyu wa
taarabu hakuwa anaumwa wakati mauti
yanamkuta.
KALALE PEMA PEPONI KIPENZI CHETU BI.
SHAKILA.chanzo michuzi blog

Hakuna mwanamke anayependa kuolewa na
mwanaume halafu kwa muda mfupi waachane,
bali kila mwanamke ana kiu ya kutaka kuishi na
ampendaye mpaka pale mauti yatakapo
watenganisha, Kwa misingi hiyo,ndoa ni jambo
muhimu na gumu kwa wakati mwingine hasa
linapokuja suala la kuchagua mwenzi wa kuishi
naye maishani, hivyo basi mwenye nia ya kuoa
utamtambua kwa haya.
ALIYE MKWELI.
Katika hili, hekima na busara nyingi huhitajika
kutumika, ngao kubwa ya utambuzi juu ya
mpenzi uliyenaye kuwa mume mwema
linategemea sana hili, Ukweli ni silaha muhimu
sana katika uhusiano, Japo natambua kuwa,
kuna wengine watajiuliza utajuaje kama huyu ni
mkweli au siyo. Kitendo cha kukutamkia kuwa,
anakupenda ni cha ukweli sana hasa kama
atakuwa anakupenda kwa dhati, Baadhi ya
wanaume wanafikia hatua kuongopa na hata
kuazima gari na kujifanya kuwa ni lake ili
akunase. Kumbuka wahenga walisema ‘njia ya
muongo ni fupi’ hivyo baada ya muda
utachambua pumba na nafaka.
ANAYEJALI
Wahenga waliendelea kunena,`nyota njema
huonekana alfajiri’. Huo ni msemo wa zamani
wa wazee wetu ambao una maana kubwa sana.
Kama mwanaume huyu ambaye kwa sasa ni
mchumba wako (wazazi wawe wanatambua)
anakupenda, lazima atakujali, kukuwazia wewe
katika maisha yake yote, hukuona kuwa wewe ni
mwenye thamani kubwa katika maisha yake,
Hatakusumbua kwa kutaka ngono kabla ya muda
muafaka wa kufanya hivyo. Anayejali afya yako
kwanza na hatathubutu kushiriki tendo la ndoa
kabla hamjapima virusi vya ukimwi,
anakupeleka hospitali unapokuwa mgonjwa
(haijalishi kama una wazazi au wasaidizi
wengine).
ALIYE NA MSIMAMO THABITI
Huyu huonekana mapema sana, asiyetingishika
wala kushawishiwa na marafiki zake, katika
mambo yasiyofaa, Hushikilia msimamo wake
katika kutekeleza yale yote aliyokuahidi na
aliyopanga kuyafanya kwa ajili
yenu, Mathalani, ameambiwa na watu kuwa
wewe una uhusiano na mwanaume mwingine,
Mwenye msimamo huchukua muda mwingi
kufanya uchunguzi juu ya aliyosikia kabla
hajakuuliza chochote.
Nathubutu kusema hivyo kwa sababu kuna
baadhi ya wanaume wana kasumba mbaya,
wanaposikia kitu kuhusu wachumba zao, au
wapenzi wao, kabla ya kufanya uchunguzi
humjia juu mwanamke husika na wakati
mwingine hufikia hata hatua ya kumpiga, Hii ni
hulka mbaya ambayo baadhi ya wanaume
wanayo, lakini jaribu kujiuliza, kama hamjaoana
anadiriki kukupiga kama ngoma na akikuoa je, si
atakufanya kilema?
ANAYESHAURIKA
Siku zote, amekuwa mkweli kwako,
anakubainishia mali zake pamoja na biashara
zake. Haoni vibaya pia kukufundisha juu ya
kuendesha mali zake. Inapotokea unamshauri,
hukusikiliza kwa makini na kufanyia kazi ushauri
unaompa. Mwanaume huyu hutulia na kuyapima
maneno yako kwa makini kabla hajayafanyia
kazi, Ni vyema mumeo ashaurike (inapobidi) ili
asifanye madhara mengine katika maamuzi ya
familia kwa kisingizio cha ubaba ndiyo kichwa
cha familia.
ANAYEJALI NDUGU ZAKO
Waswahili wanasema `ukipenda boga, penda na
ua lake’kwa wakati mmoja, msemo huu
unasisitiza upendo. Kwamba kuna vipimo
kadhaa vya upendo lakini moja ni kumwangalia
kama ana upendo na ndugu zako, Mwanaume
huyu mara zote hukuulizia hali ya wazee wako
pamoja na ndugu zako wengine. Hii ni sawa na
mawingu kabla ya mvua, Kwa sababu kama
atashindwa kuwajali ndugu zako japo kwa
kuwajulia hali utakapoingia katika ndoa
atakuruhusu ukawasabahi kweli? Hili ni kama
msingi katika kumpata mume bora.

MAPOKEZI makubwa yanamsubiri Waziri Mkuu,
Kassim Majaliwa anayetarajiwa kuwasili leo
mchana mjini Mpanda kuanza ziara ya kikazi ya
siku nne mkoani Katavi inayoambatana na
kutembelea, kukagua miradi kadhaa ya
maendeleo na kuhutubia mikutano ya hadhara.
Hii itakuwa ni mara ya kwanza kwa kiongozi wa
juu wa kitaifa kutembelea mkoa wa Katavi
tangu Serikali ya Awamu ya Tano ilipoingia
madarakani, ziara ambayo itamfikisha pia katika
mkoa jirani wa Rukwa.
Katibu Tawala Msaidizi wa Mkoa wa Katavi,
Lauteli Kanoni amesema ziara ya Waziri Mkuu
mkoani humo itaanza leo na kutarajiwa
kuhitimisha ziara yake Agosti 23, mwaka huu.
Kwa mujibu wa ratiba, Waziri Mkuu atawasili leo
mchana kwenye Uwanja wa Ndege wa Mpanda
kisha ataelekea Ikulu Ndogo ambako
atasomewa taarifa ya mkoa na kuzungumza na
watumishi wa serikali katika viwanja vya ikulu
ndogo.
Siku itakayofuata atakwenda katika Kijiji cha
Majalila, kunakojengwa Ofisi za Halmashauri ya
Wilaya ya Mpanda na kutembelea mradi wa maji
kijijini humo kabla ya kuhutubia mkutano wa
hadhara.
Kwa mujibu wa ratiba yake, anatarajiwa
kuhutubia mikutano ya hadhara katika kijiji cha
Ndui kilichopo kwenye makazi ya wakimbizi ya
Katumba na katika uwanja wa Azimio, Manispaa
ya Mpanda.
Aidha, Agosti 22, mwaka huu Waziri Mkuu
atafanya ziara ya siku moja katika wilaya ya
Mlele ambapo atawahutubia wananchi wa
Inyonga katika Halmashauri ya Wilaya ya Mlele
kabla ya kuelekea katika Kijiji cha Majimoto,
Halmashauri ya Mpimbwe atakapokagua ujenzi
wa daraja la mto Kavuu na baadaye kuhutubia
mkutano wa hadhara.
Waziri Mkuu Majaliwa anatarajiwa kufanya
majumuisho ya ziara yake Agosti 23, mwaka
huu katika ukumbi wa Idara ya Maji mjini
Mpanda kabla ya kuelekea wilayani Nkasi
kuanza ziara ya siku tatu mkoani Rukwa.