Ajali ya barabarani imetokea leo asubuhi eneo la
Igurusi mkoani Mbeya ikiwa imehusisha basi la
abiria mali ya Kampuni ya New Force, malori
mawili ya mizigo na gari jingine dogo.Basi hilo la
abiria hufanya safari zake kati ta Tunduma na
Dar es Salaam.
Jeshi la Polisi bado halijatoa taarifa kuhusu
chanzo cha ajali hiyo na kama kuna watu
waliofariki kutokana na ajal hiyo.

Rais Obama aondoka Ikulu akishauri bangi iwe
ruksa kama sigara, pombe
RAIS wa Marekani anayemaliza muda wake,
Barack Obama, amesema anadhani matumizi ya
bangi yaruhusiwe lakini udhibiti wake ufanyike
kama ilivyo katika matumizi ya sigara au pombe.
Hata hivyo, pamoja na mtazamo wake huo
kuhusu bangi, kiongozi huyo amesema hawezi
kulipigia debe suala hilo katika siku zake
zilizosalia katika Ikulu ya Marekani – White
House lakini yuko tayari kutumia muda wake
kama raia wengine wa taifa lake kuongoza
mijadala ya suala hilo.
Katika mahojiano yake na Jarida la Rolling Stone
wiki iliyopita – mahojiano yaliyoitwa ya kuaga
(exit interview), Obama amesema matumizi ya
bangi hayapaswi kufanywa kuwa kosa la jinai bali
yachukuliwa kama kosa la kiafya pale tu mhusika
anapozidisha matumizi yake hadi kupata
madhara ya kupindukia (addiction).
Kwa mujibu wa Obama, si busara kwa hali ilivyo
sasa nchini humo ambapo baadhi ya majimbo
yamekuwa na sheria inayoruhusu matumizi ya
bangi na mengine yakipinga matumizi hayo – hali
hiyo ikijitokeza katika taifa moja.
Kwa hiyo, anasema bangi iachwe kama ilivyo
kwa pombe na sigara lakini tu kuwekwe masharti
ya kitaifa kuhusu tahadhari za kiafya.
"Ni suala tete kwa Idara ya Sheria au Wakala wa
Usimamizi wa Sheria za Matumizi ya Dawa
kusimamia kikamilifu sheria hizi zilizoigawa nchi
vipande vipande kisheria– kwamba katika jimbo
moja suala hilo si kosa kisheria lakini ukipatikana
na hatia katika jimbo jingine ndani ya nchi hiyo
hiyo kwa suala hilo hilo unaweza kufungwa jela
miaka 20," alisema Obama.
Kwa sasa matumizi ya bangi kwa ajili ya
kujiburudisha yamehalalishwa kisheria katika
majimbo nane nchini Marekani na kwingine
hutumika kama dawa kwa ajili ya tiba.
Majimbo hayo ni pamoja na California,
Massachusetts na Nevada ambayo Novemba 8,
mwaka huu, wananchi wake walipiga kura
kuamua matumizi ya ‘mmea’ huo yawe halali
ama la. Katika majimbo mengine vimepitishwa
vifungu vya sheria vinavyotaka bangi iwe sehemu
ya dawa kwa ajili ya tiba.
Obama anatajwa kuvutiwa na kasi ya kuibuka
kwa mjadala kuhusu bangi kuruhusiwa kisheria
kama ilivyo wakati wa harakati za kutaka ruksa
ya kisheria kwa wapenzi wa jinsia moja kufunga
ndoa jambo lililotokea katika kipindi chake cha
urais.
"Kama ilivyowahi kuelezwa, nimewahi kuvuta
nikiwa mdogo, na niliona hiyo ni tabia mbaya
lakini vile vile haikuwa na tofauti kubwa na
sigara ambazo nazo zimekuwa nikivuta wakati
wa ujana na nilipoingia katika utu uzima. Sidhani
kama ina hatari kubwa kama ilivyo kwa pombe,"
aliwahi kusema Obama katika mahojiano
aliyopata kufanyiwa mwaka 2014.
"Kwa hiyo huu ni mjadala ambao umeiva sasa,"
aliliambia jarida la Rolling Stone, na kuongeza;
"..kama ilivyokuwa katika suala la ndoa za jinsia
moja. Tayari katika sehemu za nchi yetu hili
suala ni halali kisheria."
Inadaiwa kwamba kwa sasa watafiti wamebaini
kwamba matumizi ya bangi yanaungwa mkono na
idadi kubwa ya watu katika kipindi hiki kuliko
ilivyopata kuwa katika miaka ya nyuma nchini
Marekani.
Kwa mujibu wa utafiti uliofanywa Septemba
mwaka huu, na taasisi ya Pew Research ya
Marekani, takriban asilimia 57 ya Wamarekani
wanaamini kuwa ni vizuri matumizi ya bangi
yahalalishwe kisheria ikilinganishwa na asilimia
37 wanaodhani kuwa iendelee kuwa haramu
kisheria.
Hali hiyo inatajwa kuwatofauti na ilivyokuwa
miaka 10 iliyopita, ambapo matokeo ya utafiti wa
aina hiyo yalionyesha mambo kuwa kinyume
kabisa – ikibainika asilimia 32 walikuwa
wakiunga mkono matumizi ya bangi kuwa halali
kisheria lakini asilimia 60 wakipinga.
Nafasi ya bangi kisheria
Nchini Marekani taasisi ya DEA inayohusika na
vita dhidi ya dawa za kulevya imeiweka bangi
katika kundi moja na dawa za kulevya aina ya
heroin na kwa mujibu wa taasisi hiyo, matumizi
ya bangi humweka mtu katika hatari kubwa ya
kufanya vitendo kinyume cha sheria.
Tangu miaka ya nyuma Obama amekuwa
mkosoaji mkubwa dhidi ya uamuzi wa taasisi hiyo
kuiweka bangi katika kundi moja na dawa za
kulevya aina ya heroin.
Mwaka 2014 katika mahojiano yake na gazeti la
New Yorker, alisema anadhani matumizi ya bangi
hayana madhara makubwa kama ilivyo kwa
matumizi ya pombe.
Na katika mahojiano mengine aliyowahi kufanya
hivi karibuni na mwanahabari Bill Maher, Obama
alisema; "Marekani inahitaji mjadala makini zaidi
kuhusu namna gani hasa suala la bangi na sheria
nyingine dhidi ya dawa za kulevya zinavyoweza
kupatiwa suluhu katika udhibiti."
Lakini kwa mujibu wa Rais Obama, kwa sasa hali
ya kisiasa haimpi nafasi ya kuwa mpiga debe wa
moja kwa moja wa harakati za kuhalalisha
matumizi ya bangi kisheria, ingawa pia, kwa
nafasi yake kama raia wengine, anasema
anaweza kusaidia katika mjadala wa suala hilo

Islamabad, Pakistan. Ndege ya Shirika la
Pakistan imeripotiwa kuanguka kaskazini mwa
nchi hiyo ikiwa na abiria 47 muda mfupi baada
ya kuanza kuruka.
Taarifa za maofisa wa polisi zimesema kuwa
ndege hiyo yenye namba PK-661 iliyokuwa
ikiruka kutoka mji wa Chitral kuelekea Islamabad
ilipoteza mawasiliano kabla ya baadaye
kudhibitishwa kuwa ilikua imeanguka.
Msemaji wa shirika hilo, Danyal Gilani alisema
ndege hiyo ilikuwa imebeba abiria 30 na wengine
waliosalia wakiwa wahudumu na marubani.
Katika taarifa yake shirika hilo lilisema ndege
hiyo ilikuwa imebeba watu ‘wanaokadiriwa kuwa
40’ lakini taarifa kutoka mamlaka ya anga ilisema
kulikuwa na watu 47. Ofisa mwandamizi wa
polisi, Laiq Shah alisema ndege hiyo ilianguka
katika eneo linalofahamika kama Haveliana.
“ Timu ya waokoaji imeelekea kwenye eneo la
tukio nadhani baada ya hapo tutapata taarifa
zaidi,” alisikika akieleza msemaji wa Mamlaka ya
Viwanja vya Ndege, Pervez George wakati
akizungumza na Reuters.
Maofisa wa polisi katika eneo hilo waliiambia
televisheni ya taifa kuwa ndege hiyo ilianguka
katika kijiji kimoja kilichopo kaskazini mashariki
mwa Pakistan.
Shirika la habari la AP liliarifu kuhusu kundi la
waokoaji kuelekea kwenye eneo la tukio. Moshi
mkubwa ulishuhudiwa ukivuka toka eneo ambalo
ndege hiyo ilianguka. Imeelezwa kuwa ndege
hiyo ilipoteza mawasiliano dakika 90 tangu ianze
kuruka.

Rais John Pombe Magufuli ametengua uteuzi wa
Msajili wa Hazina Ndg.Lawrence Mafuru na
kumteua Dr.Osward Mashindano kuwa Msajili
mpya Hazina. Katika taarifa iliyotolewa na
Kurugenzi ya mawasiliano Ikulu inasema Mafuru
atapangiwa kazi nyingine.
Siku chache zilizopita Mafuru alinukuliwa na
vyombo vya habari akisema kuwa hakuna
mtumishi yeyote wa umma aliyewahi kulipwa
mshahara wa TZS Mil.40 kwa mwezi. Kauli ya
Mafuru ilitafsiriwa kuwa inapingana kauli ya Rais
JPM aliyoitoa miezi kadhaa iliyopita ikisema
wapo baadhi ya watumishi wa umma waliokua
wakilipwa takribani TZS Mil.40 kwa mwezi.
Katika hatua nyingine Mafuru alisema pia kuwa
hakuna kosa lolote kwa mashirika ya umma kuwa
na fixed account kwenye benki za biashara.
Mafuru alifafanua kitaalamu sababu ambazo
zinaweza kupelekea mashirika ya umma
kufungua fixed account kwenye benki za
kibiashara. Rais aliivunja bodi ya TRA kwa madai
kuwa ilikuwa ikiweka fedha kwenye fixed account
ktk benki za kibiashara.
Lawrence Mafuru ni mtaalamu aliyebobea na
mwenye uzoefu mkubwa katika masuala ya
uchumi na fedha. Amewahi kuwa mkurugenzi wa
fedha wa taasisi ya Lolos Consultant, Afisa
Mtendaji Mkuu na baadae Mkurugenzi Mtendaji
wa benki ya taifa ya biashara (NBC), Mkurugenzi
wa rasilimali na masuala ya uchumi Ikulu
(Director of Resource Mobilisation and Economic
Sectors at the President Office).
Vilevile amekuwa Rais wa Taasisi ya fedha ya
ACI Financial Marketing, na Mhasibu Mkuu wa
benki ya taifa ya biashara (NBC), kabla ya kuwa
Afisa Mtendaji mkuu wa benki hiyo. Pia amewahi
kuwa Mwenyekiti wa chama cha wataalamu wa
mabenki Tanzania.
Mafuru amewahi kufanya kazi pia na benki ya
Standard Chartered kama Meneja Mauzo na
mkuu wa kitengo cha ukuzaji biashara, na kuwa
mjumbe wa Bodi ya wakurugenzi katika benki ya
taifa ya uwekezaji (TIB). Pia amekuwa mjumbe
wa bodi ya wakurugenzi wa taasisi ya fedha ya
Kwanza Financial Services Limited. Kwa sasa
Mafuru ndiye Mwenyekiti wa Bodi ya
Wakurugenzi ya Benki ya CRDB.
Ana stashahada ya juu ya masuala ya kibenki
kutoka chuo cha usimamizi wa fedha (IFM),
Shahada ya Uzamili ya usimamizi wa biashara
(MBA) kutoka chuo kikuu cha Dar es Salaam, na
cheti cha utambuzi kinachotolewa kwa
wataalamu waliobobea kwenye masuala ya
kibenki kutoka The Chartered Institute of
Banking, London.
Unadhali kutumbuliwa kwa Mafuru kutoka Hazina
kuna uhusiano wowote na taarifa alizotoa kwenye
vyombo vya habari hivi karibuni?? Nini maoni
yako?

WAZIRI wa Nchi, Ofisi ya Rais, Menejimenti ya
Utumishi wa Umma na Utawala Bora, Angellah
Kairuki amemuagiza Mkurugenzi Mtendaji wa
Mfuko wa Maendeleo ya Jamii (Tasaf),
kuwasimamisha kazi maofisa waandamizi watano
wa mfuko.
Maofisa hao ni wanaosimamia mpango huo
pamoja na Meneja wa Uratibu na Mkurugenzi wa
Uratibu kutokana na kushindwa kusimamia
mpango wa kunusuru kaya masikini.
Kairuki alisema maofisa hao ndio viongozi
wasimamizi wakuu wa mpango huo katika
Awamu ya Tatu ya Tasaf na wamesimamishwa
kupisha uchunguzi wa jinsi walivyohusika
kuvuruga utekelezaji wa mpango huo hadi kufikia
kuandikisha kaya zisizo na sifa ufanyike.
Akizungumza na waandishi wa habari jana, Dar
es Salaam, Kairuki alisema ameshauriana na
Waziri wa Nchi, Ofisi ya Rais, Tawala za Mikoa
na Serikali za Mitaa (Tamisemi) na tayari
ameshaelekeza waratibu wa Tasaf wa wilaya pia
wasimamishwe kazi.
“Nimemwelekeza Mkurugenzi Mtendaji wa Tasaf
awasimamishe kazi mara moja na kuendelea na
hatua nyingine za kinidhamu dhidi ya maofisa
washauri 106 walioko kwenye halmashauri
walioshindwa kufuatilia na kusimamia mpango
huu mpaka kusababisha kaya zisizostahili
kuingizwa kwenye mpango na kuendelea kulipwa
isivyostahili,” alisema Kairuki.
Aidha alisema ameagiza ufanyike uchunguzi wa
kina kubaini ushiriki wa maofisa hao na kuchukua
hatua stahiki kwa wale watakaothibitika
kuhusika.
Aidha ametaka uchunguzi huo ukamilike ndani ya
mwezi. Karuki alisema baada ya uhakiki
kufanyika kaya 55,692 zimeondolewa kwenye
mpango kutokana na sababu mbalimbali ikiwemo
vifo, kaya kuhama kijiji, kutojitokeza mara tatu
mfululizo kupokea ruzuku, kuwa wajumbe wa
kamati mbalimbali, wastaafu, viongozi na
watumishi wa umma.
Alisema kuanzia Januari 2014 hadi Septemba
2016, Sh 6,427,110,309 zimeokolewa kwa kaya
42,035 zilizoondolewa kwa kipindi hicho na kwa
kuwa kazi hiyo ni endelevu kuanzia Oktoba 2016
wakikamilisha kuziondoa kaya zisizostahili kiasi
hicho cha fedha kinaweza kubadilika.
Hata hivyo amewaagiza Tasaf kuhakikisha
wanaendelea kushirikiana na halmashauri
kuongeza udhibiti wa fedha wakati wa malipo na
kuhakikisha fedha zinalipwa kwa kaya zenye sifa
peke yake.
Aidha, amewaagiza Tasaf kuendelea kushirikiana
na halmashauri zote kukamilisha kazi ya uhakiki
wa nyumba kwa nyumba katika halmashauri zote
nchini kabla ya malipo yanayofuata ya Januari/
Februari 2017 kufanyika.chanzo habar leo

WIZARA ya Elimu, Sayansi, Teknolojia na
Mafunzo ya Ufundi imesema itazifutia usajili
shule zote binafsi, ambazo zitabainika kukiuka
agizo la serikali la kuzitaka shule zote nchini
kuwa na mihula miwili ya masomo badala ya
mitatu, ambayo imekuwa inafuatwa na shule
zisizo za serikali.
Ili kutekeleza azma hiyo, wizara hiyo imewaagiza
wakaguzi wa shule pamoja na maofisa elimu wa
wilaya, kufanya ukaguzi katika shule binafsi
zilizoko katika meneo yao; kubaini kama kuna
shule binafsi zilizokaidi kutekeleza Waraka wa
Elimu Namba Moja wa Mwaka 2015.
Kaimu Kamishna wa Elimu, Venance Manori
alisema wizara yake ilitoa waraka huo ikiwa ni
njia ya kukazia Waraka wa Serikali Namba 5 wa
Mwaka 2012 ambao ulikuwa unaelekeza mihula
ya masomo kwa shule za sekondari na vyuo vya
ualimu, ifanane ili kuepusha usumbufu kwa
walimu na kwa wanafunzi.
Waraka huo ulifafanua kuwa kila muhula utakuwa
na likizo fupi na likizo ya mwisho wa muhula na
siku za masomo kwa mwaka zitakuwa ni 194.
Pia waraka huo unataka siku za michezo ya
Umitashumita na Umiseta kwa shule za msingi
na sekondari, zifanane kwa shule zote. Lakini
pamoja na kuwepo waraka huo, baadhi ya shule
zisizo za serikali zimeendelea kufuata mihula
mitatu.
Baadhi ya shule katika ripoti za wanafunzi za
mwezi Desemba kwenda kwa wazazi,
wameonesha kuwa mwaka ujao wa masomo
utakuwa wa mihula mitatu na nyingine minne.
“Wizara ilifanya utafiti na kujiridhisha kuwa
haiwezekani shule zinazotoa elimu msingi kuwa
na mihula mitatu, ndio maana tukataka nchi
nzima tuwe na mfumo ambao unafanana ili
kuepusha usumbufu kwa walimu na wanafunzi,”
alisema Manori.
Alisema kwanza haamini kama kuna shule
ambazo sio za serikali ambazo bado zinafuata
mihula mitatu, na akaongeza kuwa kama zipo na
wizara hiyo ikapata uthibitisho, lazima hatua za
sheria zichukuliwe na hatua mojawapo ni
kuzifuatia sheria.
“Ule waraka ulisambazwa kwa mamlaka zote za
utekelezaji ukiwemo umoja wa shule binafsi na
taasisi inayosimamia shule za dini ya Kikristo na
shule za Baraza la Kiislamu, hivyo hakuna
kisingizio cha mtu kutopata huo waraka, hivyo
lazima wautekeleze,” alieleza Manori.
Hata hivyo, pamoja na waraka huo baadhi ya
shule binafsi, zimekaidi agizo hilo na zimeendelea
kufuata mihula mitatu, jambo ambalo ni kwenda
kinyume cha maagizo hayo ya serikali. Kutokana
na ukaidi huo, Manori alisema kuanzia mwakani,
shule ambazo zitabaini kukaidi agizo hilo
zitafutiliwa usajili.
Manori alisema wakaguzi wa elimu hiyo ndio kazi
yao kuhakikisha kwamba maagizo yote ya serikali
yanafuatwa. Pia alitoa mwito kwa wazazi ambao
wanapata maelekezo ya mihula ya shule
inayoenda kinyume cha maagizo ya serikali,
waripoti suala hilo kwa malofisa elimu wilaya na
wakaguzi wa shule.
“Sio kwamba wazazi wote waje hapa wizarani
kulalamika, wale wanaoweza walete malalamiko
hayo na walioko mikoani waende kwa maofisa
elimu wa mikoa, wilaya na wakaguzi wa shule ili
hatua stahiki ziweze kuchukuliwa,” alifafanua
Kamishna huyo.
Alisema hivi karibuni wizara yake itatoa kalenda
ya masomo na mihula, itakayofuatwa na shule
zote zinazotoa elimu msingi, kama walivyotoa
kalenda ya masomo katika mwaka huu.
Pia alikiagiza Chama cha Wamiliki wa Shule na
Vyuo Binafsi nchini (TAMONGSCO), Baraza la
Waislamu Tanzania (Bakwata), Tume ya Huduma
za Kijamii ya Kikristo ambao ndio wanasimamia
shule ambazo sio za serikali nchini, kuhakikisha
wanachama wao wanatekeleza waraka huo wa
serikali.
Msimamo wa Tamongsco Katibu Mkuu wa
Tamongsco, Benjamin Nkonya alipoulizwa kutoa
maoni yake alisema, “Niko kwenye mkutano,
lakini sisi bado hatukubaliani na waraka huo wa
serikali, nitumie e-mail yako nitakuandikia sababu
za kupinga waraka huo.”
Hata hivyo, Nkonya baadaye alituma nakala ya
barua iliyoandikwa na yeye kwenda kwa Katibu
Mkuu wa Wizara ya Elimu, Sayansi, Teknolojia na
Mafunzo ya Ufundi kumwomba shule binafsi
ziendelee kutumia mihula mitatu kwa sababu
inarahisisha ukusanyaji wa ada kutoka kwa
wazazi na walezi.
Nkonya pia alisema Tamongsco imetaka mihula
mitatu kwa sababu mfumo huo unaruhusu baadhi
ya shule kufungwa Aprili wakati huo ambao huwa
na mvua za masika katika baadhi ya sehemu
nchini, mvua inaharibu barabara na hivyo
kusababisha gharama kuongezeka kutokana na
magari ya shule kuharibika.
Alisema Tamongsco pia imebaini kuwa mihula
hiyo mitatu, inatoa fursa kwa wenye shule
kuzifanyia matengenezo shule zao.

SERIKALI imesema kuwa maji upatikanaji wa
maji katika mkoa wa Dar es Salaam umefikia
asilimia 72 na kwamba Mpango wa Maendeleo
ya sekta hiyo wa miaka mitano ijayo
utawezesha kufikia asilimia 95.
Kwa upande wa vijijini, maji yanapatikana kwa
asilimia 72 sawa na Dar es Salaam, huku mijini
yakipatikana kwa asilimia 86 na katika wilaya
yanapatikana kwa asilimia 60.
Hayo yalibainishwa juzi na Katibu Mkuu wa
Wizara ya Maji na Umwagiliaji, Mbogo
Futakamba, wakati akihojiwa kwenye kipindi cha
Tunatekeleza kinachorushwa na TBC 1.
Futakamba alisema katika awamu ya kwanza ya
mpango huo, walifanikiwa kutekeleza miradi
1,310 na kwamba Julai mwaka huu wameanza
mradi huo wa pili wa kuhakikisha upatikanaji wa
maji vijijini, mijini, usafi wa mazingira na utunzaji
wa rasilimali za maji.
“Tunahakikisha kwamba kila Mtanzania anapata
majisafi na salama na hii sekta ichangie katika
ukuaji wa uchumi kupitia sekta ya viwanda. Hizi
takwimu ni sahihi kwani tumetumia zile za
Mpango wa Matokeo Makubwa Sasa (BRN)
zilizoonesha ni kwa namna gani watu walifikiwa
na huduma hiyo,” alisema.
Alifafanua kuwa vitu vinavyokwamisha
utekelezaji wa miradi hiyo ni changamoto
mbalimbali, ikiwemo uwekezaji katika
miundombinu hiyo, uharibifu na mfumo wa chini
wa upatikanaji wa maji kuwa ya chumvi hivyo
hakuna wananchi ambao wako tayari kutumia.
Alisema kwa Dar es Salaam, maji yanapatikana
lita zaidi ya milioni moja kutoka Ruvu Juu huku
Ruvu Chini ikitoa maji zaidi ya lita milioni 270.
Akizungumzia mradi wa Kidunda uliopo
Morogoro ambao pia utasambaza maji kwenye
mikoa ya Pwani, Morogoro na Dar es Salaam,
alisema utekelezaji wake umefanyika na
unasaidia kudhibiti mafuriko, kupeleka maji
katika mto Ruvu.
Alisema masuala ya kitaalamu yamekamilika.
Aliongeza kuwa pamoja na kuweka sheria kwa
watu wanaoharibu miundombinu hiyo,
wameanzisha jumuiya za watumiaji maji ambao
wanapewa mafunzo ya kuangalia masuala ya
utawala, utunzaji fedha na utunzaji miundombinu
na kudhibiti uharibifu ambao mara nyingi
hufanywa na wananchi.
Kwa mujibu wa Futakamba, hali hiyo imesaidia
sana kwa kuwa wananchi wanajua kwamba huo
ni mradi wao na ukitokea uharibifu wanakuwa
tayari kufanya matengenezo katika maeneo
yaliyoharibiwa.
0

Rais wa Jamhuri ya Muungano wa Tanzania Dkt.
John Pombe Magufuli amekutana na kufanya
mazungumzo na Mkurugenzi wa Masoko ya
Afrika wa Kampuni ya utengenezaji wa ndege ya
Boeing yenye makao yake nchini Marekani Bw.
Jim Deboo.
Rais wa Tanzania Dkt. John Magufuli
Mazungumzo hayo ambayo ni sehemu ya juhudi
za Serikali za kununua ndege kubwa kutoka
kampuni hiyo, yamefanyika Ikulu Jijini Dar es
Salaam na kuhudhuriwa na Katibu Mkuu
Uchukuzi Dkt. Leonard Chamriho na Katibu Mkuu
wa Wizara ya Fedha na Mipango Bw. Doto
James.
Baada ya Mazungumzo hayo Rais Magufuli
amesema Serikali yake ya Awamu ya Tano
imedhamiria kununua ndege nyingine nne
zikiwemo ndege kubwa 3 ambazo zitasaidia
kuinua uchumi wa nchi kwa kuwezesha watalii
kuja hapa nchini moja kwa moja kutoka nchi zao.
"Sisi hapa tunazungumza kuwa watalii hawajafika
hata milioni 2 kwa mwaka, lakini nchi kama
Morocco inapata watalii zaidi ya milioni 12 kwa
mwaka, hii yote ni kwa sababu hatuna mashirika
ya ndege ya kwetu, watalii wakitaka kuja hapa ni
lazima waje kwa kuungaunga, wafikie nchi
nyingine halafu ndipo wapate moyo wa kuja huku,
licha ya kwamba sisi Tanzania ni miongoni mwa
nchi 5 duniani zenye maeneo mazuri yenye utalii.
"Kwa hiyo niwaombe tu Watanzania wapende
mali zao, kwa sababu wakati mwingine
nikiangalia mitandao na magazeti ni ajabu huwezi
kuamini kama hao ni Watanzania, unakuta
wanasifia tu ndege za watu wengine na
wanazibeza za kwao" amesisitiza Rais Magufuli.
Mhe. Rais Magufuli ametaja aina ya ndege mpya
ambazo Serikali itazinunua kuwa ni ndege 1 aina
Bombardier Q400 Dash 8 NextGen inayotarajiwa
kufika nchini Mwezi Juni 2017, ndege 2 aina ya
Bombardier CS300 zenye uwezo wa kuchukua
kati ya abiria 137 na 150 na zinazotarajiwa
kuwasili nchini kati ya Mei na Juni, 2018 na
ndege moja aina ya Boeing 787 Dash 8 Dream
Liner yenye uwezo wa kuchukua abiria 262 na
inayotarajiwa kuwasili nchini Juni, 2018. Malipo
ya awali kwa ndege hizi yameshafanyika.
Dkt. Magufuli amewataka Watanzania kuunga
mkono juhudi hizi za Serikali zenye lengo la
kuinua utalii na kuimarisha uchumi wa nchi.
"Tumeleta ndege aina ya Bombardier hapa,
zimepunguza gharama za safari mfano kutoka
Dar es Salaam hadi Mwanza, sasa wanalipa kati
ya 160,000/ hadi 200,000/- wakati nauli ilishafika
Shilingi laki 8 na kitu, lakini watu wengine
utakuta wanazungumzazungumza wee maneno
ya hovyo kwa kutumiwa, tumeshaamua na
tutafanya hivyo" amesisitiza Rais Magufuli.